أخبار العربية

قصيدة رائعة للشاعر الأمير / محمد السديري (رحمه الله)


يقول من عـدّا علـى راس عالي
رجمٍ طويـل يدهلـه كـل قرنـاس

في راس مرجـومٍ عسيـر المنالي
تلعبْ به الأرياح مـع كـل نسْنـاس

في مهمهٍ قفرٍ مـن النّـاس خالـي
يشْتاق له من حس بالقلب هوجـاس

قعدت فـي راسـه وحيـدٍ لحالـي
براس الطويل ملابقه تقـل حـراس

متذكـرٍ فـي مرقبـي وش غدالـي
وصفّقْت بالكفين ياسٍ علـى يـاس

أخـذت أعـدّ أيامـهـا والليـالـي
دنيا تقلّـب ماعرفنـا لهـا قيـاس

كم فرّقـت مابيـن غالـي وغالـي
لو شفت منها ربح ترجع للافـلاس

يقطعـك دنيـا مالـه أول وتـالـي
لوأضحكت!للغبن تقرع بالأجـراس

المستريح اللي مـن العقـل خالـي
ماهو بلجـات الهواجيـس غطّـاس

ماهو بمثلـي مشكلاتـه جـلا لـي
أزريت أسجّلهن بحبـرٍ وقرطـاس

حملـي ثقيـل وشايلـه باحتمالـي
واصبر على مر الليالـي والأتعـاس

وارسي كما ترسي رواسي الجبالـي
ولايشتكي ضلعٍ عليـه القـدم داس

يابجاد شـب النّـار وادن الدلالـي
واحمس لنا يابجاد مايقعـد الـراس

ودقّـه بنجـرٍ ياظريـف العيـالـي
يجذب لنا ربعٍ على أكـوار جـلاس

وزلّه إلى منّـه رقـد كـل سالـي
وخلّه يفوح وقنّـن الهيـل بقيـاس

وصبّـه ومـدّه ياكريـم السبـالـي
يبعد همومي يوم اشمّـه بالانفـاس

فنجـال يغـدي ماتصـور ببـالـي
وروابع تضرب بها أخْماس وأسداس

لاخـاب ظنـي بالرفيـق الموالـي
مالي مشاريهٍ علـى نايـد النـاس

لعـل قصـرٍ مايجيـلـه ظـلالـي
ينهد مـن عالـي مبانيـه للسـاس

لاصـار ماهـو مدهـلٍ للرجـالـي
وملجا لمن هو يشكي الضيم والياس

بحسناك يامنشي حقـوق الخيالـي
ياخالق أجنـاس ويامفنـي أجنـاس

تجعـل مقـره دارس العهـد بالـي
صحْصاح دوٍ دارسٍ مابـه اونـاس

البـوم فـي تالـي هدامـه يلالـي
جزاك ياقصر الخنا وكـر الأدنـاس

متـى تربّـع دارنــا والمفـالـي
وتخضرّ فياضٍ عقب ماهيب يبّـاس

نشـوف فيهـا الدّيدَحـان متوالـي
مثل الرعاف بخصر مدقوق الألعاس

ونمشي على البيدا سوات الزوالـي
يشرق حماره شرقة الصبغ بالكـاس

وتكبر دفـوف معبّسـات الشمالـي
ويبني عليهن الشحم مثل الأطعـاس